FAROL DA GUIA - MACAU

Farol.
Greza,
Pinheral.

Luz,
Fé,
Saúde.

Farol, tira-tira da luz;
Anôte, mar lumiado,
Aliviado di iscuridám,
Lorcha sabe únde têm,
Passá sáfo,
Nádi erá caminho.

Greza, Casa di Dios,
Ninho di fé cristám;
Nos' Siòra tem lá altar,
Su ôlo lumiá alma,
Su mám isvazia bênça
Protezê dizamparado.

Na basso, pinheral,
Jardim di saúde vendido saguáti.
Árvre di pinhêro quânto-mil,
Laia-laia árvore unga porçam.
Sopro di vento puro,
Voz dóci di prasto alegrá coraçám.

Na riva di montánha
Lugar qui tudo pôde olá,
Têm unga pau arto levantado;
Ali, unga bandêra elegánti ra buli-buli;
Sã, atê estunga ora,
Bandêra di nôsso Portugal.


Poema extraído do livro Macau Di Tempo Antigo - José dos Santos Ferreira